Comeback dai Rangers

Comeback dai Rangers La Pli do da plü de 30 agn

L’ultimo venders, ai 05.09, edl sté la scuadra de pale dal paisc dla Pli co á soghé söa pröma partita tal campionat provizial VSS Kleinfeld Ost. Do 30 agn de assënza ea la ligrëza do le comeback grana. I Rangers La Pli, ennom ispiré ala scuadra dla Pli tai agn 90, sá con gran entusiasm y impegn arjigné ca a cösta sajun. I Rangers vëgn manajés dal U.S. La Pli y soga te ciasa sön le ciamp a Ciamaor, n’á pö La Pli desco unich paîsc dla Val Badia ciamó degün ciamp dal sport.
La partida de daurida é gnüda sogada fora de ciasa cuntra la scuadra SG Barbian/Villanders, co â slüt jö le campionat l’ultima sajun desco pröms. La formaziun de ciasa mët man belo atira con en gran slöm, mo i Rangers stá bun te ciamp y é bogn da tigní bot. Ensciö é la scuadra ladina bona al 5° minut con na aziun de cuntrapé da segné le gol dal 0:1. Atlo edl Alfons co i dá le palê tla profondité a Pius co ne se lascia nia petlé ben dio y cazüleia la coghera sora le portier ete. Dedo edl endo i patruns de ciasa co tol la partida tla man y é ensciö bogn da segné al 13° minut le gol dal 1:1. Dan la fin dal pröm tomp esai ciamó bogn da fá dui goi y ensciö portai le resultat sön en 3:1. Do le barat de ciamp edl le Barbian co tira na trata dal ciantun, le palê röa adoss a n difensur ladin y coghereia spo bel plan do le palo ete (4:1).
Dedo edl spo i Rangers co proa ciamó da meter ete döt ci che ai à, mo ensciö se daürai y conzed ciamó diversces ocajiuns ala formaziun de ciasa. Le förtl y la maiú esperiënza dal Barbian y ince la desfortünna dai Rangers, con trei autogoi, desmostra che al é ciamó trep da fá.
La partida se röa ala fin con en risultat final de 7:1. Ince sce le risultat n’ea nia chel che an se aodâ, é cösta stada na bona proa por i Rangers, ince por odei te ci aspec che an mess ciamó mioré. La proscima partida é belo endo en vendres ai 12.09 a Pfeffersberg.