Da novité a protagonisć: la sajun dai Rangers La Pli
Do plü de 30 é la scuadra dai Rangers La Pli co à endo soghé na sajun entiera t’en campionat de jüch al palé, scrienn ensciö na bela plata de sport por la comunité d’La Pli.
La scuadra é stada formada da śogadus atifs, mo ince da jont co á tut la dezijiun da se iesti ciamó eniade i cialza da palé i da jí indô zoruch sön ciamp de jüc, portenn ensciö a en mix de esperiënza y entusiasm. Le meter man de sajun ne é nia sté le plü sciompl: les prömes partides á i Rangers belo atira mossü afrontè döes dles mius scuadres dal campionat, co á dominé les ultimes ediziuns. Por la maiù pert dai sogadus é le sogo sön picio ciamp na novité y porchel al orü ester en pü de tomp por s’ adatè.
Mo belo tla terza partida é roes adalerch i pröms punc, segn de na chersciüda costanta. La cuarta partida é spo stada la pröma te ciasa cuntra l’ACD Val Badia, dan á en publich numerus, olache i Rangers á davagné 2:1.
Dedô édl ciamó sté dui derby cuntra l’ US Rina y l’ ASC Mareo, olache i Rangers s’á tut para 4 punc, desmostrenn da ester bogn da competer cun düc. Tles ultimes trëi partides dal rode d’ andata an podü odei döes deventes y na gran prestaziun cuntra l’ FC Tonig Bar Feldthurns: da 3:0 sot, é i Rangers stes bogn da porté le risultat al 3:2 y á manacè da la parejé.
Le rode de retüda à metü man tla miú manira poscibla, cun na deventa cuntra i pröms tla tlassifica (SG Barbian/Villanders). La partida do à porté en pareje (2:2) cuntra i nös capolista da Pfeffersberg. Tai derby cuntra Rina y Mareo á i Rangers fat 3 punc te döes partides.
Öna dles plü beles prestaziuns é stades cuntra Feldthurns te ciasa: ince sce i Rangers á pordü 4:5 á la scuadra mostré gran compatëza, spirit de grup y veia da dé döt.
La penultima partida cuntra Vandoies é stada na sorpresa negativa sön en ciamp rio y insidius, mo la sajun é gnüda stlüta jö co na deventa alta de 13:1 cuntra Falzes te ciasa, co à porté i Rangers al cuint post tla tlassifica finala.
Da evidenzié édl ince le travert arjunt da Pius Ploner co é deventè con 24 goi capocannoniere. Merit i vá ince a döta la scuadra y dantadöt ai portiers Manuel Palfrader, Alex Pedevilla y Manuel Costabiei por avei albü la secunda miù defenjiun dal campionat, con n unich gol conzedü en plü respet ai pröms.
Ala fin pon di che la scuadra à fat na sajun de gran valur, cun alć y basc, mo entres con n spirit y na snait co á imprescionè düc. Che ess pa mai punsé che na scuadra empormò fondada y con döt śogadus dal picio paisc d’ La Pli foss bona da tigní vare y davagné cuntra scuadres con trec agn de esperiënza te cösc campionat?
I Rangers oress ince to cösta ocajiun por rengrazié l’ alenadú Paul Chizzali, düc i sponsors y dantadöt i trec fans co é entres, sides te ciasa co fora de ciasa, stes i plü numerusc y i plü dadalt.
Iolan a düc y a proscima sajun!