davagnÉ cuntra i Pröms da Barbian/Villanders!
Do la gran pausa da d’invern met la secuda pert de campionat por i Rangers atira man con na partida cuntra i pröms dal campionat: SG Barbian/Villanders. Cutra ei á i Rangers belo soghé tla andata olache ai á pordü 7 a 1 fora de ciasa.
En sabeda dan otede él endere la scuadra da Barbian/Villanders co á mossü gni te Mareo a soghé la partida, con temperatöres dertan partida sot ai 0°C.
I Rangers sâ che ara ea der ria da i tigni bot ai gesć. Le pröm tomp met man con na aziun ofensiva dla scuadra de ciasa. Atló garetel na bela combinaziun d’anter Pius y Luca, olache cöst ultimo abina bel sec la traversa. Dedô él spo la scuadra da Barbian/Villanders co mostra ciodi che ai é pröms. Do da 10 minuc i garetel ai gesć le gol dal vantaje. Püch dedô al 16’ minut esai bogn da anüzé la confujiun tla formaziun dai Rangers y fej ensciö le 0 a 2.
Döt ciarâ fora aladô che i Rangers se ciafass endô na laada dai pröms. Mo avisa te cösc momont de dificolté met la scuadra d’La Pli man da zané deplü sön vigne palê, da alzé les lignes y da pressé i sogadus aversars. I gesć desmostra endere gran esperionza y é ensciö bogn dal stlü jö le pröm tomp sön le 2 a 0.
Tal secundo tomp sozedel ci che bonamonter ma püc sess enpunsé.
I Rangers met man le secundo tomp con gran orenté da oje le risultat. Ai tol tres deplü tles man la partida y fej de beles combinaziuns, ti lascenn ensciö ma plü püch le palê ai gesć. Al 36’ édl spo Fidelis co tira sön porta. En defensur é ciamó bun da paré sö le palê, mo fajenn ensciö i röa la coghera a Pius co ne bazileia nia y de pöma la metel te rei por le 1 a 2.
Dedô él i gesć co proa da mostré val reaziun, mo i Rangers á na gran conzentraziun i ne i conzed nia. Sön na soraposiziun jö por la fascia de Alex Ploner él Fidelis co i da jö le palê y Alex tira sön le palo lunch y fej ensciö le gol dal 2 a 2.
Do cösc gol édl endô chi da Barbian/Villanders co s’endespra. Ai met man da avei plü ocajiuns y tira gonot sön porta. Le portier dai Rangers, Manuel Palfrader, á endere entres la miú. Mo l’ocajiun plü prigorosa te cösta fasa á i Rangers, con Fidelis, co abina con na bela trata la stangia de porta.
La partida é tal se roé y döt ciara fora desche ara se röi con en pareje. L’ arbiter da endere ciamó dui minuc de recuper y te cisc suzedel de döt. Chi da Barbian/Villanders á ciamó na buniscima ocajiun olache ai röa en dui cuntra porta. Ai é bogn da i passé dlungia ia a Manuel Palfrader, mo canche ai tira sön porta édl ciamó Alfons co pordüj da trá fora le palê co ea belo sön ligna de porta. Le palê i va a Thomas co ial da atira a Fidelis, co i passa con trepa cualité le palê a Luca co röa ensciö su dan le porta. Al ti fej danpröma tunel al portier y sblürla spo le palê sora ligna por le risultat de 3 a 2. Atira dedô él spo gnü sciüré la fin.
Te cösta partida an odü che con na gran convinziun y creta cina ala fin vara da fá adöm de gran resultać.