Derby dassënn combatü

En vendres dan otedé él endo gnü le de olache en gröm de jont de Mareo s‘ abina ete Ciamaor por odei le derby ASC Mareo cuntra i Rangers La Pli.

La partida met man y atira vegun che entrames les scuadres é prontes da dé döt. Al vëgn combatü sön vigne palé zonza i scinché nia al aversar. Al 10’ minut édl le Mareo co fej na bela aziun ofensiva, olache en defensur dai Rangers é ciamo bun da tigní sö le śogadù marô con en fal al limit dal aria co i costa endere ince la ghela. Le defensur mess ensciö lascè le ciamp de jüch por 2 minuc desco de dant dal regolamënt dal calcio a 5. I Rangers é bogn da passé chisc per de minuc defenen bun y conzeden püch. La partida resta der ecuilibrada, con de pices ocajiuns por entrames les scuadres. Dan la fin dal pröm tomp édl i Rangers co röa endere der danprò al gol dal vantaje. Enlo édl Alex Ploner co eseguësc snel la rebatüda sön Pius, co tira le palé sonza ciare te area, olache al ti röa avisa a Matio Palfrader, co é bun da l’ oje cuntra porta, mo baldi édl la stangia de porta co tin le resultat ennant sön le 0 a 0. Püch dedô sciüra spo l’arbiter la fin dal pröm tomp.

Le secundo tomp met man desche le pröm se roé, con entrames les scuadres co da döt por ne ti lascé gnanca en meter de lerch ai aversars. Ara va trep ia y ca con tramesdöes le perts co a tres endo val ocajiuns, mo i dui portiers é focoses y para vigni trata co röa sön porta. I śogadus dles döes scuadres salta trep y al ven fat trepes sostituziuns, mo le resultat romagn invarié. Ala fin dla partida édl sides le Mareo co i Rangers co á na bona ocajiun da fá gol mo le palé n‘ ô en che sera nia jí te porta. Enscö se röa la partida de paca 0 a 0. En resultat che an ne veg nia gonot pa na partida de jüch al palé sön picio ciamp, olache al toma normalmonter tres cotan de goi. I trec spetadus na podü odei degügn goi, mo porchel na partida combatüda, plena de contrasć y co döes scuadres co á de veramonter döt te ciamp.

La proscima partida śoga i Rangers en sabeda ai 17.10 te ciasa cuntra Falzes.