Derby davagné dai Rangers La Pli

Dan otedé, ai 27 de setëmber 2025, édl sté i Rangers co á soghé söa pröma partida te ciasa te cösc campionat cuntra l’ US Alta Badia.

La partida mët man con na bona ocajiun por i Rangers. Al 6’ minut édl Pius co röa a na trata, mo chera vá baldi, por le desplajëi dai trec spetadus, a finí sön la stangia de porta. Dedô édl tramedöes les scuadres co röa a plü conclujiuns, co n’é endere nia dër prigoroses. Al 18’ röa i Rangers endô dan la porta aversara, mo ince en cösc iade n’é la fortüna nia dla pert dla scuadra d’La Pli y le palé röa por le secundo iade sön la stangia de porta. Tal rest dal pröm tomp ne sozedel nia plü cis trep y ensciö vá le scuadres tla pausa con en risultat de 0:0.
Do le barat de ciamp édl i Rangers co mostra che ai ó davagné le derby i se porté a ciasa i trëi punc. Ensciö mëtai atira man con en gran slöm. En minut do la batüda de scomenciamënt i garetera ai Rangers La Pli da fá le gol dal vantaje. Atló édl Pius co é bun con na bela aziun personala da dribelné dui sogadus aversars y con na trata tal piz bas da lascé scassé la rei de porta. En minut dedô (al 32’) röa Pius ciamó en iade a na conclujiun, con na aziun co pö na copia de so pröm gol, y porta ensciö le risultat sön le 2:0. I Rangers proa da manajé la partida y da porté a ciasa le risultat. Al 38’ minut i sozedel endere en fal tla fasa de costruziun. Le sogadú dal Alta Badia rengrazia y segna le gol dal 2:1. Al 43’ minut ven la scuadra de ciasa endô prigorosa dan la porta aversara. Baldi röa le palé sön la traversa y sön la rebatüda édl le portier dal Alta Badia co fej en gran intervënt. Tai ultims minuc ne i conzed i Rangers plü degünes ocajiuns prigoroses ai aversars. Al 60’ minut édl endere l’arbiter co i da na poniziun de secunda al Alta Badia püc metri dan la porta dai Rangers. La trata vá, por fortüna dai Rangers, a finí sön traversa y sön la rebatüda édl Manuel co fej na gran parada. Dedô vegnel spo sciüré la fin.

I Rangers La Pli davagna ensciö le pröm derby ladin te cösc campionat con en risultat de 2:1. En gran iolan oressun i dí a düc i trec spetadus co é gnüs a se ciaré y i a fá tifo por nos. La proscima partida dai Rangers ven sogada en dedolönesc ai 07 d’otober les 20:30 te ciasa, ete Ciamaor, cuntra l’ US Rina.