Desfata al ultimo secund por i Rangers La Pli.

L’ultimo vendres, ai 12.09, edl ste la scuadra de palé dal paîsc dla Pli co á soghé söa secunda partida tal campionat provinzial VSS Kleinfeld Ost. En cösc iade i ara toché ai Rangers da ji a soghé a Pairdorf cuntra l‘ ASV Pfeffersberg.
La partida met man con i padruns de ciasa co druca bindebo dassen. Ensciö esera spo che le Pfeffersberg segna al 10° minut le gol dal 1:0. Püch dedo al 19° i garetel spo ciamó le gol dal 2:0. Dedo edl spo i Rangers co met man da to entres de plü la partida tles mans. Al 26° minut, do na bela combinaziun danter Manuel y Pius, i garetel a Pius le gol dal 2:1.
Do le barat de ciamp edl i Rangers co met man bun y röa cotan de iadi dan la porta aversara. Al 36° edl spo Wilhelm co proa na trata da dalunc y é ensciö bun da segné le gol dal 2:2. Al 44° minut el la scuadra da Pfeffersberg co ciafa na puniziun püch dan l’area, olache i Rangers ne se á nia aspeté che la formaziun de ciasa la batess atira y ensciö el en sogadú aversar co ciafa le palé su dan porta i á ma plü albü bria da le sbürlé sora linia de porta ete, fajen ensciö le gol dal 3:2. I Rangers ne o nia la dé sö y proa les dötes da fá le gol dal pari. Al 56° miniut el Alan co ciafa le palé a mesaciamp y ti lascia jö na bela trata co va a finí avisa tal ciantun alt dla porta y segna ensciö le 3:3 con en gol spetacolar. Do avei arjunt la parité el i Rangers co ó porté a ciasa i 3 punti y met ensciö döt sön öna na cherta. Baldi ne gareta cösc nia y ensciö edl al ultimo minut chi da Pfeffersberg co é bogn da fá le gol dal 4:3 sön na aziun de cuntrapé. Dedo sciüra l’arbiter la fin.
Cösta é na desfata co fej sogü me, mo i Rangers á belo endo na ocajiun da sé refá en vedres ai 19.09 les 20:30 a Meransen cuntrá l’ASV Gitschberg.