I Rangers La Pli Davagna cuntra L’ASC Mareo

L’ultimo vendres, ai 10 d’otober, édl sté le gran derby danter les döes scuadres de Mareo. Deache al é na partida der sontida y che an ne odeâ belo da agn nia plü él ince gnü trëpa jont a ciaré y a fá tifo por les döes scuadres. La partida met man con i Rangers La Pli co drucá dassënn. Ensciö toma le pröm gol belo do da püc minuc. Atló édl Manuel co i fej en bel passaje a Pius jö por l’ara co met spo le palé ete a mez l’area, olache Omar con na trata bassa é bun da fá le gol dal 0:1. L’ ASC Mareo proa, do cösta spordüda tai pröms minuc, da mostré na reaziun. Ai mët man da to le jüch entres de plü te söes mans. Mo sön en fal dla defenjiun dal Mareo, tla fasa de costruziun, i röa le palé sön i pisc a Pius, co ne bazileia nia ben dio y tira le palé sön porta y lascia scassé la rei. Ensciö stara do da gnaca 10 minuc belo 0:2 por i Rangers La Pli. Tal rest da pröm tomp édl le Mareo co detëia le jüch, mo i Rangers se para tres endo bun. Püch denant co jí tla palsa i vegnel conzedü na trata dal ciantun a la scuadra de ciasa. Atló édl l’atacant dal Mareo co ciafa le palé su dan porta y é bun da fá le gol dal 1:2. Tal meter man dal secudo tomp édl tramedöes les formaziuns co röa a plü de te pices ocajiuns, mo co ne ven nia plü co entant prigoroses. Al 40’ minut i garetel al defensur dal ASC Mareo, na trata sterscia da dalunc, a chera che le portier dai Rangers n’é nia plü bun da i dí de no. Ensciö ven porté le resultat sön en 2:2. Sön chëra édl ince endo i Rangers co mët man da druché deplü y mostra che ai o se porté a ciasa na devënta. Do de en per de minuc de confujiun olache ara é jüda trep ia y ca i garetel, a diesc minuc dan la fin, le gol dal 2:3 ai Rangers. Atló édl Manuel co i passá le palé a Pius co é t’area. Chel é bun da se oje y da spizoré la coghera te porta. Dedo édl i Rangers co se para ciamó bun cuntra i tentatifs dal ASC Mareo da fá le gol dla parité.

Ensciö se porta i Rangers La Pli a ciasa trei punti der sontis cuntra l’ ASC Mareo y se mët al 4° post te tlassifica de campionat