I Rangers La Pli pert cuntra l’ ASV Vintl

Do la bona partida cuntra Feldthurns olache al à mancé püch por davagné, i ara l’ultima jöbia tochè ai Rangers da jì a Weitental a soghè fora de ciasa cuntra la scuadra da Vandoies.

La partida met man bun y i Rangers à plü ocajiuns, olache na trata de Pius röa tla traversa y rembalzëia daete dla linia de porta, mo l’ arbiter ea ciamó a mez ciamp y na nia odü, ensciö romàgnel le 0 a 0. I Rangers druca enant, mo le palé no nia jì te porta. Denanche le pröm tomp se röi, édl ciamó Fidelis co röa a na contlujiun sön porta, mo baldi röa ince chera ma sön stangia de porta.

A meter man dal secundo tomp édl la scuadra ladina co à ciamó na bona ocajiun sön en passaje falé da pert de en defensur dal Vintl, mo ince cösc iade röa le palé a finì sön la stangia de porta.

Dedô édl i Rangers co pert te en per de situaziuns la conzentraziun y se ciafa ensciö te püch tomp dui goi (2:0). La scuadra d’La Pli proa da oje le resultat, mo l’ arbiter met te n iade man da lascè jì trep y da sciürè püch, favorisenn la scuadra da Vintl co po soghè plü gro y se fej ensciö plü saurí da defene.

Al 51 minut édl Fidelis co i passa en bel palé a Alan co é bun da le meter te porta por le 2 a 1. Sön cösta édl döta la scuadra co se proa ciamó en iade deplü, mo a chi da Vintl i garetel tosc le gol dal 3 a 1 sön en fal de n sogadù dai Rangers. La partida se röa spo püch dedô.