I Rangers La Pli stlüj jö le campionat con na roa de goi

Por l‘ ultima partida de campionat édl gnü la scuadra da Falzes a soghè ete Ciamaor cuntra i Rangers La Pli.

Do che i Rangers na nia albü der trepa fortüna tles ultimes trei partides, vëigon atira che ai ó stlü jö cösc campionat con na bona prestaziun.

Ensciö tomel belo al 5 minut le 1 a 0, olache Alex fej en lancio t’area a Pius, co sal met jö, soc, y fej atira na trata co va avisa sot les iames dal portier.

Gnanca 4 minuc dedô édl Matthias Frontull co é bun da trà fora na puniziun al limit d’ aria. Enlo édl Alex co le passa debota ete cuntra porta, olache al é endo Pius co é le plü asvelt y é bun da le spizoré te porta por le 2 a 0.

Sön le 2 a 0 édl chi da Falzes co proa da mostré na reaziun y met man da fa plü presciun. Ensciö i garètel le 2 a 1. Mo ai ne pordüj gnanca der da se meter sö endo, che Manuel Costabiei passa le palé a mez jö a Fidelis co tira na bela trata da 10 metri y le met te rei por le 3 a 1.

Püch dedô édl Armin co ciafa le palé da Elias, le portier ven fora y con en bel rampin édl Armin co frega le portier, co sciafià ma plü da fà fal. Ensciö édl i Rangers co ciafa en önescmetri. Armin se sorantol responsabilité da le trà, mo baldi él le portier co abina le piz y ial para. Armin ne se lascia endere nia porte fora da cösc, y belo 2 minuc dedô sön en bel passaje de Alan él bun da fà scassè la rëi por le 4 a 1. Püch denanche le pröm tomp se röi édl ciamó Thomas co fej na soraposiziun y ciafa en bel palé da Pius y é spo bun con na bela trata da le meter te porta por le 5 a 1.

Le secundo tomp met man desche le pröm sa roé, con i Rangers co fej le jüch y ne i conzed degüna ocajiun a chi da Falzes.

Matthias fej na bela aziun singolara jö por la fascia olache al nen sonta dui da Falzes y le passa spo ete a Pius, co mess ma plü le parè te porta por le 6.a 1.

Sen édl endo Armin co se met en jüch y é bun da fa te püc minuc 3 goi. Le pröm al ma bria da sbürlé te porta do en bel passaje de Fidelis. Le secundo é ön dai plü bi goi dla sera. Enlo édl endo Fidelis co passa le palé a mez ciamp, olache Armin le tira con na trata sterscia avisa tal „Kreuzeck“, olache le palé s’asmacia finamai do la rei y la stangia de porta ete y ne ven gnanca plü jö dal ćiantun alt dla porta.

Pal terzo al ciafé en bel palé da Alex y enlo al ince ciamó en iade albü le pè cialt por fà so 4 gol personal dla sera y le 9 a 1 por i scuadra d’ La Pli.

I Rangers nen na endere ciamó tres nia assa y druca porchël tres ennant. Le 10 a 1 él spo Elias co fej. Danló édl Manuel co ti fej en passaje a Elias co tira na bela trata te porta.

Atira dedô édl spo endo Matthias co fej na bela aziun co Alan, olache cösc ultimo é bun da fá scassè la rei de porta por le 11 a 1.

Le 12 a 1 é spo endo ste en beliscimo gol, olache sön na rebatüda dal Portier da Falzes édl le palé co ti röa al difensur dai Rangers Alfons, co é bun da le to de pröma y le meter con gran forza te porta.

Püch denanche la partida se röi édl ciamó Matthias co fej so terzo assist dla partida a Elias, co é bun da fá so secundo gol dla sera y le gol final por le 13 a 1. Da evidenzié é ince la bona prestaziun de Manuel Costabiei co s’á motü a desposiziun da stè te porta cösta partida. A él oressun ciamó i di en gran iolan.