Na partida combatüda
En vëndres dan otedé á śoghé i Rangers La Pli a Weitental cuntra la scuadra da Vandoies.
La partida mët man tla manira plü subotimala por i Rangers La Pli. Belo al 1‘ minut édl la scuadra ladina co se ciafà le pröm gol do na dejatenziun iniziala dla pert dla defenjiun. Do cösta pröma spordüda á i Rangers ciafé tres plü confidënza y é ince roes a plü contlujiuns sön porta, zonza endere gnì plü co entant prigorusc. I śogadus da Vandoies jea ete der dürs tai contrasć fajenn ince gonot intervënć co é pordërt proibis tal jüc al palé sön picio ciamp, mo l’ arbiter i lasciâ jí en che sera der trep bun a la scuadra de ciasa. Püch denanche le pröm tomp se roass edl spo ciamó tomé le gol dal 2 a 0 sön na trata da dalunc.
Le secundo tomp mët man con i Rangers co proa da mostré na reaziun y da rodé la partida. Tai pröms minuc röai plü gonot a contlujiuns prigoroses. Al 42‘ minut i vëgnel conzedü na trata dal ciantun. Alto edl Fidelis Ploner co tira le palé ete cuntra la secunda stangia olache al é Alex Ploner co se fej ciafé bel su y a ma plü bria da sbürlé le palé sora linia de porta ete por le gol dal 2 a 1. Al 45‘ minut edl endo la scudra de ciasa co ven prigorosa. Do en pü de confujiun dan porta i röa le palé al atacant co é bun da le trá te porta por le gol dal 3 a 1. Püc minuc dedô toma ince le gol dal 4 a 1 sön na aziun en cuntrapé. Al ciarâ fora desche sce le risultat foss belo zementé, mo i Rangers ne lâ dio nia ciamó dada sö. Belo ma dui minunc dedô al 48‘ do na bela combinaziun d’ anter Wilhelm Hochwieser y Alan Ellecosta röa cösc ultim su cuntra le portier y tira le palé tal piz lunch fajenn ensciö le gol dal 4 a 2. Al 50‘ minut édl spo Wilhelm co é bun da i tó le palé jö dai pisc al portier i da fá le 4 a 3. Te cösta fasa edl i Rangers co druca dassënn y proa da fá le gol dla parité a chel che ai é roes der dlungia con na trata da defora da pert de Thomas Ploner. Al 56‘ minut suzedel spo en episode co müda la partida a bëgn dla scuadra da Vandoies. Sön na aziun ofensiva dla scudra de ciasa edl l’ arbiter co sciüra en fal al limit dal area sön en contrast de jüch normal. Mo cösc ne nia döt. Al i da cinamai na ghela al defensur ladin. Ensciö mess i Rangers śoghé por dui minuc con en śogadù en manco y le momentum dla partida se sposta sön la pert dla scuadra de ciasa. Passes chisc dui minuc sön na trata co ven deviada dui iadi dla defenjiun i garètel a Vandoies spo le gol dal 5 a 3. Do da cösc edl i Rangers co á ciamó val ocajiun mo l’ arbiter sciüra tosc la fin.
Al é sté na partida complicada por i Rangers sön en ciamp der sfadius, mo ince sce ara ne á nia basté por rodé le resultat á la scuadra mostré na gran reaziun y combatü cina ala fin.