Na roa de goi
En sabeda dan otedé, ai 25 d’otober, á i Rangers La Pli soghé söa ultima partida te ciasa, por cösc altonn, cuntra l’ASV Vintl.
La partida met man con en trames le scuadres co stá bun te ciamp y ne i lascia nia trepes poscibilitês al aversar. Do da en per de minuc édl i Rangers co alza le ritm y druca cotan deplü. Ensciö y garetel al 9’ minut le gol dal 1:0. Atló édl Elias co ciafa le palé da Alfons y é bun con na bela trata tal piz bas da segné le gol dal vantaje. Püc minuc dedô édl Alfons co tira na flancada sön Pius, olache cösc ultimo é bun da se meter jö le palé y da se oje atira fajenn a cösta manira le gol dal 2:0. La formaziun da Vandoies se stontâ dassënn te chisc minuc y fajea tres endo fai. Ensciö suzedera che al 14’ minut édl le difensur co fej en passaje falé co i röa söi pisc a Pius co ne bazileia nia ben dio y porta i Rangers sön le 3:0. 5 minuc plü tert, al 19’ minut, édl le portier dal ASV Vintl co para na bela trata de Manuel, mo n’é nia bun da se apié le palé. Alex é te cösta situaziun le plü asvelt y röa desco pröm sön le palé, che al á ma plü albü bria da sbürlé sora linia de porta ete (4:0). I Rangers no nia lascé do y al 22’ minut con na bela combinaziun danter Pius y Elias röa Elias su dan porta y fej le gol dal 5:0. Denanche le pröm tomp se röi i vegnel conzedü en önescmetri a la scuadra da Vandoies. Manuel, le portier dai Rangers, é endere bun da spizoré la trata sön traversa. Ensciö vá les scuadres tla pausa con en resultat de 5:0.
Tal secundo tomp édl i gesć co met man miú y é atira bogn da fá le gol dal 5:1. En minut dedô édl endere belo endô i Rangers co röa dan porta aversara. Atló édl Omar co i passa le palé amez a Pius co fej le 6:1. I Rangers fej der na bona parüda y gnanca le secundo gol dai gesć (6:2) ne i porta fora dla conzentraziun. Al 43’ minut édl Omar co fej en passaje, co taia fora la defenjiun deplëgn. Le palé röa sön Pius co á ma plü bria da le sbürlé te porta (7:2). Denanche la partida se röi édl ciamó Elias co fej en gol spetacolar de tach. Le resultat final é de 8:2 por i Rangers co se porta a cösta moda a 3 punc dal terzo post.