Ön, Dui, trei – Remontada da Temei

En jöbia dan otedé, ai 30 d’aurì, edl stè le pröm derby dal rode de retüda por i Rangers d’La Pli, olache ara i à tochè da jì ia Rina a soghé cuntra la scuadra de ciasa.

La Partita ess mossü meter man les 20:00, les döes scuadres ea belo scialdes ete y prontes da soghé, mo l’albiter n’ea egnó da ciafé.
Do che al é spo gnü damanè do al VSS tan dio che ara döra cina che al roa alerch, el gnü fora che al nen gnea degün. Te cösc cajo dij le regolamont, che sce entrames les scuadres è a öna spo edl ince na porsona co n’é nia en arbiter ofizial co po sciüré la partida.
Al é spo stè la scuadra da Rina co à damanè sce Richard Ferdigg les fat y él é stè a öna da to sö cösta enciaria. Nos d’ La Pli orun porchel ciamó en iade to l’ocajiun da i di en gran iolan a Richard, ciodi che al ne nia da düc da soranto da sciüre na partida de campionat y dantadöt en derby.

Ensciö an spo, por fortüna dla trepa jont co é gnüda a ciarè, podü meter man da soghé.

La partida met man con le Rina co fej le jüch y i Rangers co mess se conzentrè sön le defene te cösta pröma fasa. Le Rina druca tres deplü y al 11’ minut i garetel a Manuel Mellauner l’1 a 0 sön na batüda de puniziun püch dan l’area.
I Rangers proa da de na resposta, mo ai stonta da roé te partida. Al 24’ minut tomel spo le 2 a 0 por le Rina, olache sön na trata dal ciantun él Klaus Promberger co taia ete sön la pröma stangia y é bun da spizoré le palê te porta.

Do le 2 a 0 édl spo desche sce i Rangers se foss endespres t’en iade. Sön la batüda de scomenciamont édl Pius co ciafa le palê da Alfons, é bun da s’oje y con en rampin da roé a mez dui fora. Al tira y le coghera röa bel dlungia la stangia de porta ete por le 2 a 1. Do cösc gol él la partida co sè cambiada dassënn. Le Rina é ma plü iadedô a se paré, y chi d’La Pli á foradenia plü ocajiuns da gol, mo ne nia bogn da le meter ete. Le pröm tomp se röa esciö sön en 2 a 1 por le Rina.

Le secundo tomp met man avisa desche le pröm se roé, con i Rangers co mostra na gran orentè da oje la partida. Al 40’ minut toma le gol dal 2 a 2 co ea belo en bel pez tal aria. Enlo él Pius co i tol le palê sön en fal dla defenjiun da Rina, se tira jö por la fascia con na aziun de forza y le passa ete a mez. Enlo édl Alan co se fej ciafè pronto y sbürla le palê te porta.
Sen édl ince endo le Rina co röa plü gonot a contlujiuns, con en per de beles trates da dalunc, olache le portier dai Rangers, Manuel Palfrader, se mostra tres pronto.
Al 51’ minut tomel spo le gol dla sera.
Atlo édl Fidelis co bat na tratada de ciantun. Le palê ven devié y ti röa söi pisc a Thomas Ploner, co ne bazila gnanca n sich y tira la coghera de ciamp cuntra porta. Elias la lascia passè sot les iames fora y le palê va a finì avisa tal piz bas.
Na gran ligrëza por döta la scuadra y dantadöt por Thomas, co a segné so pröm gol con la malieta dai Rangers.

Do le 3 a 2 édl le Rina co proa ciamó da fa le gol dla parité mo i Rangers defenn bun. La scuadra d’La Pli à ciamó val ocajiun da fá en gol o l’ater, mo al mancia entres na frizia. La partida se röa ensciö con na deventa en remontada por i Rangers d’La Pli.