Partida Dominada

En vendres é la scuadra d’La Pli jüda fora de ciasa a soghé söa ultima partida dal rode d’andata a Falzes, cuntra le FC Kleinfeld Pfalzen.

Do che i Rangers á albü en valgügn minuc da s’ausé al ciamp da erba mol, ai motü man da to le jüch tres de plü te söes mans y n’á plü lascé degügn dübe ai trec spetadus, co é ince gnüs fora de ciasa a fá tifo, che cösta partida vá da davagné. Mo i jun dan pro ia. Tai pröms 10 minuc era jüda der sö y jö con en gröm de pici fai cometüs da entrames les scuadres. Al 11’ minut i garetel le gol dal vantaje ai Rangers. Enló édl Manuel co se tira jö por la l’ara derta y passa le palé zoruch a Pius, co fej na bela trata co va a finí te porta (0:1). Do cösc gol édl i Rangers co röa tres endô a conclujiuns prigoroses sön porta. Al 20’ minut esai spo bogn da fá le gol dal 0:2. Atló édl Thomas co i fej en bel passaje tal büsc a Manuel, co romagn frëit dan porta y mët le palé bel tal piz lunch, olache le portier á ma plü podü ti ciaré dô. Tal pröm tomp édl ciamó Omar y Armin co á de beles ocajiun, mo baldi ne o la coghera nia jí ete. Tal secundo tomp édl la formaziun d’La Pli co mët endô man con la conzentraziun alta y enscö édl al 38’ minut Alex co vá en soraposiziun y ciafa le palé da Alan. Alex le passa bel ete a mez, olache Pius le tira te porta por le 0:3. Al 50’ minut édl spo Fidelis co fej le 0:4 con en bel tiro da dalunc. Cösta é na beliscima noela, che dô che al s’á rot tla sajun passada le liamënt encrujé al fat te cösta partida so debüt y é cinamai sté bun da segné só pröm gol con malieta dai Rangers. Tai ultimi minuc édl sté i Rangers co se á defenü bun y ne i á plü conzedü nia ala formaziun de ciasa.

I Rangers La Pli stlüj jö le rode d’andata con na bela deventa y é bogn ensciö da mantigní le 4° post y se confermeia te cösta pröma pert de campionat desco miú scuadra dla Val Badia.