Pröma partida, pröms trëi punc por i Rangers
L’ ultimo dedemesaledema ai 16.09 edl stè i Rangers La Pli co à śoghé söa pröma partida dla sajun 2026/27 te ćiasa con le derby cuntra l’ US Rina.
La scuadra d’ La Pli s’à arjigné ca bun y ne odea nia l’ ora che la sajun nea metess man. Eniann edl ince val novites: con Felix Ploner á i Rangers en alenadú nö y con Matio Palfrader en sogadú en plü.
La partida met man con entrames les scuadres co sta bun te ciamp y defënn bun. A mez le pröm tomp edl le Rina co röa a de plü de bones ocajiuns, mo le portier dai Rangers, Manuel Palfrader, tign sö döt. Dan pro ala fin dal pröm tomp edl ince i Rangers co röa a val contlujiuns prigoroses. Al 24’ minut edl Alex Ploner co ciafa le palé sön na remetüda y con le tach le metel sö la secunda stangia, mo le portier da Rina i dij de no. Al 28’ minut garètel na bela combinaziun danter Fidelis Ploner y Alan Ellecosta, olache cösc ultim é bun da i passè le palé ete a mez area a Armin Frontull. Chel tira sön porta, mo le portier para. Ensciö se röa le pröm tomp sön en 0 a 0.
Le secundo tomp met man con de bones ocajiuns por en trames les scuadres. Al 42’ minut sön en fal tla fasa de costruziun dla pert dai Rangers i röa le palé avisa sön i pisc dal atacant dal Rina co ne bazila nia y fej ensciö le gol dal 0 a 1. Do da cösc edl la scuadra de ciasa co met man da to tres de plü la partida tles mans. Te cösta fasa i garètel de beles aziuns a chi d’ La Pli. Al 47’ minut dal spo ca le gol dla parité. Atlo édl Fidelis co ciafa en passaje filtrant da pert de Alan y da na posiziun defilada con na trata spetacolara edl bun da lascè scassè la rëi por le 1 a 1. Tla fasa finala dla partida edl i Rangers co i conzed püch a chi da Rina y manejeia la partida. Ara ciarâ fora desche sce la partida se roass en parité, mo al ultimo minut edl Pius Ploner co nen dribelnëia dui y ti passa le palé a Fidelis co le tira tal piz lunch por le gol dal 2 a 1. Püch dedô édl spo l’ arbiter co sciüra la fin.
I Rangers à ensciö motü al sogü i pröms trëi punc de cösta sajun cuntra na bona scuadra da Rina. La proscima partida soga i Rangers en vendres ai 25.09 les 20:30 a Weitental cuntra la scuadra da Vandoies.