Pröma pordüda por i Rangers La Pli

L‘ ultima sabeda edl stè le derby danter i Rangers La Pli y l’ ASC Mareo.

En cösc iade ea i Rangers la scuadra de ciasa, porchel édl gnü soghé sön le ciamp sintetich ete Ciamaor.

La partida dal rode d‘ andata à la scuadra d‘ La Pli davagné por 2:3 y cösc orei ciamó en iade fá.

La partida met indere man te na manira der sfortünada por i Rangers. Belo tai pröms 3 minuc édl l’ ASC Mareo co é bun da fá con söes prömes döes trates da dalunc dui goi y ensciö da se porté 0 a 2 en vantaje. I Rangers proa da de na reaziun, mo al ne i gareta nia cis trep, cina che al 12 minut tómel finamai le gol dal 3 a 0, endo con na trata da dalunc co va endo avisa dlungia stangia de porta ete.

Ara ciara fora mal por la formaziun d’La Pli, mo i Rangers à belo mostrè pa deplü partides che ai ne la da mai sö y che ai é ince gonot bogn da rodè le resultat. I trec fans dai Rangers co é gnüs a ciaré sa ince cösc y porchel ai fat tres fora dassënn tifo. Do gnaca 2 minuc (14’ minut) i garetel ensciö belo le gol dal 1 a 3. Atlo edl Pius co passa le palê fora lerch a Alfons y fej spo atira en inserimënt t‘ area. Alfons fej en bel cross co i röa sön le ce a Pius co é spo bun da l’ oje te porta.

Do cösc gol edl i Rangers co tol le jüc completamonter te söes mans y à cotan de ocajiuns, mo al fala en tres che ultima fortüna por lascè scassè la rei.

Le secundo tomp met man desche le pröm se roé, con i Rangers co deteia le jüch. Le Mareo proa tres endo con palês lunc da roè fora de so mez ciamp y da cherié contlujiuns prigoroses. Al 56’ minut i garetel al Mareo le gol dal 1 a 4. I Rangers ne la da nia sö y proa tres enant con de beles aziuns y cotan de trates sön porta da fá ciamó en gol, mo le portier dal Mareo Possamai Fernando fej en gröm de parades y le palê n’ ó onfoch nia jì ete.

La Partita se röa sön l’ 1 a 4. Al è en resultat alt, co ne sogü nia ste ensciö da odei te ciamp, mo i Rangers ne nia stes bogn da meter la coghera te porta y da anüzè les ocajiuns che ai à albü.