Pröms trei punc por i Rangers La Pli

Dan otedé, ai 19 de setëmber 2025, édl sté i Rangers co á soghé söa terza partida de campionat. En cösc iade i ára toché ai Rangers da jí a soghé a Meransen cuntra l’ASV Gitschberg.

I Rangers met atira man con en gran slöm y é ensciö bogn da fá con la pröma aziun do la badüda de scomenciamënt le gol dal 0:1. Atlo édl Pius co fej en bel ön-dui con Wilhelm y ensciö röa Pius a na trata che le portier aversar n’é nia plü bun da paré. Al 5’ minut édl i Rangers co pert en palé tla fasa de costruziun, la formaziun da Gitschberg rengrazia y fej le gol dal 1:1. Dedo edl tramesdöes les scuadres co röa a conclujiuns sön porta, les plü prigoroses endere i gareta ai Rangers. Al 27’ era spo tan ennant. Matthias i dá le palé jö por la fascia a Wilheml, él se tira ete empü cuntra mez y ti lascia jö na trata co fej scassé la rei de porta. Ensciö se röa le pröm tomp 1:2 por la formaziun ladina.

Do le barat de ciamp met la partida man da gni entres plü cialda. I Rangers vëiga la chance da davagné söa pröma partida. Ensciö vai sön vigne palé con determinaziun, rischienn ince da cometer en fal o l’ater. Al 40’ édl dui sogadus dai Rangers co ciafa la ghela. A desferonza dal jüch al plaé sön le gran ciamp, édl atlo le sogadú co ven amoní co mess lascé le ciamp por dui minuc y la scuadra soga entratan ennant con öna na porsona en manco. Al 46’ canche i Rangers ea endo al complet i garetel a Pius, sön na aziun en cuntra pé, le gol dal 1:3. Al 50’ édl ince i patruns de ciasa co ven endô prigorusc dan porta y é bogn da segné le gol dal 2:3. Dedô edl l’arbiter co tol valgünes dezijiuns co é por tramedöes les scuadres dër demorvëia. Al 52’ i vegnel conzedü al ASV Gitschberg en önescmetri der dubius. Cösc é endere Alex, le portier dai Rangers, bun da paré y ensciö da tigni le risultat sön en 2:3. Al 59’ röa ciamó en iade Wilhelm dan la porta aversara. Atlo édl le portier co ven fora de porta, Wilhelm spizoreia le palé dlungia cösc ia y ven spo mazé ia por tera. En trames les scuadres punsâ che l’arbiter ess sciüré en önescmetri por i Rangers do cösta aziun, mo deperpo i dal la ghela a Wilhelm y a Alfons, co ea jü a damané do na spligaziun por cösta dezijun. Ensciö édl i Rangers co mess roé la partida soghen en cater cuntra sis. Te chisc ultims minuc ne i conzed i Rangers plü degünes ocajiuns ai aversars y porta a ciasa söa pröma deventa.

Chisc pröms trei punc é gnüs defenüs cina ala fin, soghen plü minuc ince en sotnumer. La ligreza do partida ea porchel grana, mo der trep tomp da festejé na i Rangers nia, ciodi che endoman, sabeda ai 27.09 les 20:30, á i Rangers la pröma partida te ciasa, ete Ciamaor, cuntra l’US Alta Badia.