Segra d’ La Pli. Segra dai goi.

Do da trëi edemes che i Rangers La Pli ne soga nia plü te ciasa, era avisa en veia dla Segra d’ La Pli cuntra Falzes endo tan enant.

La partida met man y an veg atira che i Rangers o a vigne moda se tignì te ciasa i trëi punc. Do da 12 minuc édl la defenjiun da Falzes co fej en passaje fale y le palé ti röa a Pius Ploner, co le passa a mez olache Fidelis Ploner fej con na bela trata le gol dal 1 a 0. I gesć ne pordüj prësc gnanca da meter le palé te jüch, che la rei scassa por le secundo iade. Enlo édl endo Pius Ploner co enterzetëia le palé y met Fidelis Ploner su dan porta. Cösc ultimo romagn frëit sot porta y frega le portier (2 a 0). Do da cösc édl ince la scuadra da Falzes co se endespra y röa tres deplü te partida. Ensciö i garetel al 20’ minut le gol dal 2 a 1 do na trata dal ciantun. Mo belo ma püch dedo toma le 3 a 1, endo con na trata de Fidelis sön assit de Thomas Ploner. Denanche le pröm tomp se röi é i Rangers ciamó bogn da fá dui goi. Dampröma con Alan Ellecosta co segna le 4 a 1 sön rebatüda y al 29’ minut con na aziun personala de Pius (5 a 1).

Le secundo tomp met man desche le pröm se roé, con i Rangers co druca y fej atira le 6 a 1. Enlo édl Thomas co fej ete en cross sön la secunda stangia olache Alex Ploner á ma plü bria da sbürlé le palé sora ligna de porta ete. Dedo édl spo la scuadra d’ La Pli co á fora de nia en momont de “black-out” y se ciafa te tomp de trë minuc trë goi (6 a 4). Passada ia cösta picia spordüda é i Rangers endo bogn da derzè la partida dal der vers con en bel gol de Matio Palfrader (da Jung). Atlo ciafel le palé da Alfons Facchini y lascia jö na trata da sora mez ciamp co va a finí avisa do stangia de porta ete (7 a 4). Denanche la partida se röi édl ciamó Fidelis co fej le gol dal 8 a 4. Pa cösta aziun édl Pius co se tira jö por la fascia y passa le palé ete a mez a Fidelis co á le pé cialt y le met ete zonza bazilé.

La proscima partida soga i Rangers en vendres ai 23.10 fora de ciasa cuntra Neustift.